العش مو حطب !!!
خل يفهم الحطاب
العش بيت شرعي وساكناته طيور
وأحياناً يضم عشاگ متصافين ..
إحلام ،
وأريكه
ونافذه إعله النور
أعله غفله من الزمن
لن بيتهن مهدوم ...
والغصن اليشيله من الاصل مبتور
الدستور؟؟
منقوص إعله هذا الحال
الحقيقه ، العشگ لازم ينكتب دستور
العصافير أعتراض إلهن أعله الحطاب
جاب عشوشهن
ونطاها للتنور !!!
******
أزرع كَاع روحك
رازقي ونسرين ..
وأشتلها كَصب من يشح ماي الهور
وأفطم منجلك
لوراد يحصد غيم
وأكسر منجلك لو راد يحصد زور؟
واخذ دمعة عزيزك
وأستعيره أفراح
ولبسه العيد بيدك وأكشخ بعاشور!!!
أنشدني ..
العسل ماضايكَه النحال ..
القاروره بيده
والعسل محضور
من تلثم فراشه
خدود زهره تنام
تسكر بالندى وتطيح بالمحذور
شارب من خضار
عيونك الصفصاف
وراضع من بياض خدودك البلور
روح أشتل حياتي بشجرة الصبير
أنا احلامي عوانس
مايهمها البور!!
أفرشلي ضحكتك
خلي ، أمدد كيف
وخل في ّ الضفيره يدغدغ الناطور
تغرف روحي مني
بچفك النعسان ؟؟
وتشربني خطيه وخاطرك مكسور!!
جمعنه المايصير
البرد والنيران
شفتي تنث بروده
وشفتك تنث نور
يقام الحدّ
على من لمس شفتك يوم ؟؟
ويُحاسب ، مثل مايتحاسب المخمور
أخذ مني دمع
ماطالبك بالدين
يمته النهر راد فصول من ناعور
تدريني سَليل ،
الما يشم مشموم ،
إبن بيت العفاف
الصاوغ الله نحور
بعد شبرين عنك والحضن ينخاك
أشم ريحة ثيابك
والكَلب مسحور
ياجنة عدن
يادنيه تنبت روز
ياسحر الهند وأحلام نيسابور
هسه الحب حضاره
وبابها كرستال
تتلاكَه المجره بكل مسيه تدور
أنا روحي ندى
وروح البنات ورود !!
أنا موتي ندى
وكَلب البنات أكَبور !!
بالك تحط روحك
دكـه للتغسيل
جثمان الفرح مافززه الكافور؟؟؟
الرئيسية 
أحدث الصور 
التسجيل 
دخول 
الثلاثاء 21 أغسطس 2012, 14:23 من طرف حكمت البيداري
موضوع: العش والحطاب عماد المطاريحي شعر شعبي عراقي 
